總結：勒邦占士未打得！網友寸佢報應到
20190116
東網電視
更多新聞短片
勒邦占士暫時未能夠復出。(互聯網)
湖人喺NBA主場以107:100擊敗公牛，勒邦占士因傷繼續做觀眾，原本醫生預期，大帝有機會喺今場復出，點知始終唔掂，有網友留言寸佢嘅坦克式剷籃，多年來整傷咗唔少人，依家報應到喎！
勒邦占士缺陣導致湖人近期表現大跌，仲出現可能入唔到季後賽嘅危機，好在波爾打爭氣波有19分、8個籃板同6次助攻，協助湖人結束2連敗。另一方面，拿芬進攻嚴重失準10分、4個籃板同8次助攻，注定公牛要接受連輸8場嘅命運。
2010年占士轉投熱火，當時騎士老板Dan Gilbert嘅公開信預言大帝遲早有報應。到2011年，騎士恥辱性以57:112慘負湖人，占士喺Twitter留言反擊：「真係瘋狂，報應就係咁，咒人係唔啱嘅，神會知道一切。」
34歲嘅占士養傷3個星期，創出個人職業生涯最長連休紀錄後，已經重返訓練館，但報道話佢腹股溝傷情複雜，假如冒險復出，再傷會更大鑊，所以醫生要求佢每日用4至5個鐘頭進行恢復，保持肌肉穩定性，甚至要佢喺高壓氧氣艙瞓覺。
不過無論大帝點慘，反佢嘅球迷都唔會同情，有網民留言：「西岸壓力大，早嚟幾年肯定早就廢咗，諗下佢呢十幾年，用佢個膊頭撞過幾多人，報應嚟遲咗，太遲嘞！」另外，有網友抽水咁講：「神會知道一切。」
同日，勇士作客以142:111炒起金塊，史堤芬居里同奇利湯臣分別攻入31分，當中咖喱仔射入8個3分，加上杜蘭特有27分，協助勇士喺西岸榜首大戰贏波5連勝，而且全隊喺第1節攻入51分，射入10個3分，創出隊史單節最高得分同射入最多3分紀錄。
最新賽果(左方主場)
溜馬 131:97 太陽
76人 149:107 木狼
鷹隊 142:126 雷霆
公鹿 124:86 熱火
金塊 111:142 勇士
湖人 107:100 公牛
支持本地運動員，一齊去「睇體」！
東網體育FB同你追實體壇每個精彩時刻！