【賽後解碼】皇馬拍《復仇者聯盟4》玩X完
20190117
東網電視
更多新聞短片
艾斯高(左)錯過黃金機會。(美聯社圖片)
皇家馬德里喺西班牙盃16強次回合作客以0:1不敵雷加利斯，雖然兩回合計銀河銀艦贏3:1晉級，但皇馬今季輸到第10場波，係佢哋近20年輸波最多嘅1個球季，加上艾斯高黃金機會唔入，馬些路冇厘頭打中場，令人感覺皇馬拍《復仇者聯盟4》玩X完。
冇錯皇馬收起唔少主力，但雷加利斯都唔係派最強陣應戰，佢哋全場21次埋門有6次中目標，包括巴夫韋迪喺開波30分鐘門前混戰射入，如果唔係基羅拿華斯有5次成功撲救，或者銀河艦隊唔止失1球，輸得更肉酸都未定。
其實皇馬失波前有機會先開紀錄，點知艾斯高喺反擊中推到入禁區，竟然思考人生，起腳慢幾拍被對方球員出腳擋走個波。另外，受到傷兵問題影響，馬些路被安排推前踢左中場，亂成咁似足《復仇者聯盟4》Endgame玩X完。
上年皇馬賣走C朗，完全冇放聲氣要買頂級球星，最神奇嘅係，銀河艦隊喺冬季轉會市場重開後，依然唔願意燒錢，加上加里夫巴利成日受傷，莫迪歷又可能離隊，到底皇馬今個暑假要買咩人至拯救到球隊，問下主席皮里茲至知。
支持本地運動員，一齊去「睇體」！
東網體育FB同你追實體壇每個精彩時刻！