港超聯　燕子崗擺擂台　富力R＆F鬥東方龍獅

【陳焌鏗廣州直擊】「中銀人壽香港超級聯賽」進入次循環即上演「榜首大戰」，富力R&F周六（19日）下午在主場燕子崗體育場擺下擂台，迎接東方龍獅的挑戰。雙方現時只相差1分，富力稍有差池即會被東方龍獅奪其榜首位置，直接影響聯賽爭標形勢，因此兩軍今場勢必出盡九牛二虎之力，務求贏出這場「6分波」！

楊正光做定功課迎關鍵戰

主場出擊的富力R&F今季主場威力強勁，目前5戰4勝1和保持不敗，主教練楊正光期望延續佳績：「大家分數上好接近，今場波好關鍵，所以我哋會極力爭取入波，在於主場嚟講，我唔希望和波，會以贏波為最終目標！」為準備今場「榜首大戰」，「楊Sir」透露早前特意入場觀看東方對理文比賽，認為新援利馬彭利拿會為己隊帶來麻煩：「其實我喺葡萄牙都睇過佢一場友誼賽，畀到我嘅印象都幾深刻。雖然佢身型高大，但係行動上都好快速，用波能力、制空力都好強。依家佢去到東方，對於我哋嚟講唔係一件好事。」

陣容方面，富力中場陳俊樂因累積5張黃牌需停賽，而新外援沙治迪布尼因工作證問題，未能趕及上陣。另外，早前受傷的隊長羅拔圖則已開始進行恢復訓練。

「牛丸」︰3分不容有失

至於北上作客的東方龍獅，在周二與理文踢成平手後，迎接5日內第二場比賽，主教練陳婉婷揚言今仗不容有失：「之前喺聯賽和咗理文，我哋冇乜失分空間，今場波我哋上下都團結一致，目標係全取3分！」她續說：「雖然我哋和咗理文，但係球隊士氣、信心依然好正面，亦冇乜傷病問題，即使作客嚟到廣州，我哋仍然係準備充足去迎接今場比賽。」

球隊上仗有左閘黃梓浩被逐，今場比賽需作壁上觀，而另一位左閘球員曾錦濤亦因結婚而請假，「牛丸」承認左閘位置人手緊張，但她認為影響不大：「慶幸球隊有足夠實力嘅球員，我好相信每一個球員可以各司其職，喺閘位上，鄭璟昊、謝朗軒、徐德帥、姚浩明都可以勝任，所以我哋都有充足嘅人選去準備呢場比賽。」