【官宣】希古恩投車路士 9號魔咒等緊佢
20190124
東網電視
更多新聞短片
（車路士官網圖片）
車路士正式官宣，向祖雲達斯借用阿根廷射手希古恩半年！今季車仔鋒線人才凋零，無論係艾華路莫拉達抑或基奧特，表現都未能說服領隊沙利，為爭英超前四攞下屆歐聯資格，決定向希古恩招手。希古恩一向想挑戰英超，對今次上車寄望甚殷，同沙利故劍重逢望重上職業生涯巔峰。但希古恩要征服英超，首先要打破車仔「9號魔咒」！
希古恩通過體測後正式上車，佢非常興奮：「當機會來臨，我毫不猶疑選擇轉投車路士。呢間球會擁有輝煌歷史，而且有個完美球場，另外我一直想踢英超，所以呢個係個好機會。車路士對我好有期望，我會傾盡全力去報答知遇之恩。我急不及待落場，希望可以盡快適應新環境。」
領隊沙利對希古恩有讚冇彈：「佢係個超強前鋒，特別係我教拿玻里嘅首季，佢表現得非常好（當季射入36球）。佢毫無疑問係我合作過嘅其中一個最佳射手，並有足夠經驗應付英超。」
自C朗轉投祖雲達斯後，希古恩於祖雲達斯再無立足之地，本季初佢被借到AC米蘭，只能取得6個聯賽入球。希古恩已31歲，去到英超能否發光發熱屬未知之數，另外佢亦受到車路士「9號魔咒」威脅。自摩連奴04年執教車路士後，「9號仔」都冇啖好食，基士文41場入9球，基斯普49戰入20球，之後9號主人保拿奴斯同薛維爾更不消提。最令人失望嘅絕對係費蘭度托利斯，於利物浦時代佢所向披靡，但上車後就完全打唔出水準，聯賽落場110次竟只入20球。此後無論法卡奧以及莫拉達，着上9號波衫後都同本身水準差得遠。「9號魔咒」已維持咗16年，就睇吓希古恩有冇能力解咒。
支持本地運動員，一齊去「睇體」！
東網體育FB同你追實體壇每個精彩時刻！