高級銀牌　藍綠陣營 先禮後兵

將於周六（26日）假香港大球場上演的高級組銀牌賽決賽，由傑志火併和富大埔，兩隊繼去季兩度分別在菁英盃及足總盃，以及今季季初的社區盃對壘後，再一次在決賽碰頭。

雙方周四（24日）出席賽前記者會，藍綠兩軍先禮後兵，「藍鳥」主教練朱志光表示對手已擁有一定決賽經驗，寄語球員切勿掉以輕心，至於「綠戰士」主帥李志堅則希望球隊可以把握其具有年青及活力的優勢，能夠擊敗宿敵奪冠。

對於傑志之前3次於決賽對和富大埔均能以1球小勝對手捧盃而回，主教練朱志光則表示盃賽較容易出現變數，並提醒球員要小心應付比賽︰「始終一場過嘅盃賽，無論喺90或者甚至踢到加時嘅比賽，變化都可以好大，所以唔可以攞之前贏輸嘅紀錄作準。雖然對手都係熟口熟面，但係佢哋過去呢兩年都進步咗，亦有足夠嘅決賽經驗。雖然我哋係贏過佢，但係佢哋踢得好好，無論係舊年定今年嘅社區盃，所以球隊上下都要擺啲心機去應付呢場比賽。」至於上仗因與華杜斯碰撞而感到暈眩而退下火線的黃洋，雖然腦震盪經掃描後證實無大礙，但以安全起見會讓他休息。

和富大埔繼早前3次盃賽對傑志均以1球見負後，去年10月於聯賽則在半場落後兩球下，在換邊後連入兩球迫和對手，對於今次的藍綠對決主，教練李志堅則希望球隊不要因為對手而影響比賽心態，並以活力爭勝︰「我哋再一次入到決賽當然係開心，雖然對手都係傑志，係一支好強橫嘅班霸，但係我哋唔會諗太多係對邊一隊，而係每場比賽都以一個好有決心嘅心態去應付。根據呢兩年同傑志好多次嘅交手，我諗經驗會係佢哋嘅優勢，當然我哋都有我哋嘅優勢，比較年青同有活力。」

今屆賽事冠軍將獲得15萬元獎金，亞軍獎金則為5萬元，決賽將設由傳媒投票選出的決賽最佳球員獎項，得獎球員可獲得1萬元獎金，另外首2千名入場球迷可憑決賽當日的門券，於場內指定地點換取高級組銀牌決賽紀念匙扣。