高級銀牌　黃威：好想贏番傑志一次！

「高級組銀牌」決賽將於周六（26日）上演，香港足球總會周四（24日）舉行記招造勢，和富大埔隊長黃威亦有應邀出席。黃威在接受訪問時揚言：「上季始終聯賽同兩個盃賽都屈居傑志之下，今季希望可以贏番佢哋一次，對球隊嘅信心都有好大幫助。」

和富大埔上季在足總盃、菁英盃同樣不敵傑志屈居亞軍，連同賽馬會社區盃，3次與錦標擦身而過。今季來到銀牌決賽，再次與傑志交手，黃威表示：「自己都唔會因為3次決賽輸畀傑志而失信心，反而係喺呢幾場波之中學到嘢。決賽失利係成長一部分，經過呢3場嘅成長，令到自己同埋球隊有足夠經驗去同傑志分高下！」他續說：「經驗方面啦！始終踢決賽係一場過，經驗係好緊要，喺膠著、緊張嘅情況下，點樣發揮自己同球隊嘅能力係好重要，所以呢3場波我喺呢方面學到嘢。」