【東體爭議】前4大過天!普捷天奴變雲格

20190129
東網電視
更多新聞短片
普捷天奴認為爭前4名最重要。(互聯網)
熱刺喺英超主場對屈福特前,領隊普捷天奴被網民笑佢呃人,口不對心話唔志在盃賽,拎到前4名踢歐聯就得,英國傳媒仲改圖恥笑佢變雲格,到底普捷天奴係咪講大話,要由網友判斷喇!
雲格喺2012年講過,最重要「錦標」係聯賽前4名,結果畀包括熱刺擁躉在內嘅球迷笑到依家。點不知,熱刺喺英聯盃同英足盃連環出局後,普捷天奴搬出類似說話去安撫球迷,仲話爭盃賽要靠運氣,搞到佢畀傳媒惡搞,改圖將佢變雲格。
其實普捷天奴嘅處境都幾值得同情,因為熱刺為咗起新球場,今季佢哋成為英超史上,首間未有喺夏季轉會市場買球員嘅球會。目前熱刺喺聯賽排第3位,又入到歐聯16強算好難得,睇餸食飯下的確保住前4名最重要。
當然,英國都有消息話,實際上普捷天奴都好想捧盃證明自己嘅執教能力,所以佢可能會放棄同熱刺續約,聽從皇家馬德里嘅呼喚重返西甲,話畀球迷知佢有本事攞冠軍,絕對唔係為前4名而生嘅雲格2.0,大家要買定花生至得。
支持本地運動員,一齊去「睇體」!
東網體育FB同你追實體壇每個精彩時刻!