菁英盃　開齋兼反勝！蕭俊銘：幫到球隊更重要

菁英盃B組賽事周二（29日）於旺角大球場上演，由傑志大戰香港飛馬，飛馬雖兩度落後，但憑著艾華、佐佐木周和蕭俊銘的入波，最終以3比2擊敗傑志並升上B組榜首。

後備上陣替球隊射入關鍵一球的蕭俊銘表示：「幫到球隊我覺得係最緊要，職業生涯第一球入波雖然好興奮，但係幫到球隊奠定勝局係更重要，希望透過呢個入波爭取更多上陣機會或者入波，去幫助球隊。換入之前我淨係諗住要盡力、少啲失誤，最希望當然係幫到球隊，同埋唔好畀咁大壓力自己。落場之前陳Sir（陳浩然）都叫我哋放啲去踢，我落到場就跑，我覺得後生就係要咁！」

香港飛馬近3季對陣傑志只錄得1和7負，今場成功打破宿命，「蕭銘」坦言驚喜：「其實我冇諗過係咁嘅結局，好開心、好興奮。多謝大家支持我，其實開波前我都知道好大機會有得踢，大家叫我畀心機唔好辜負教練對我嘅期望，依家總算冇叫佢哋失望。」他續指：「雖然我唔係適齡球員，但係我都希望無論聯賽定係其他盃賽，都可以爭取一席位。」

至於香港飛馬主教練陳浩然亦對「蕭銘」寄予厚望：「今場佢爭氣啦，其實『蕭銘』踢到第4季，佢係一個有潛質、有技術嘅球員，香港唔係咁多呢種球員。好多時練波之外，都會同佢傾，叫佢放鬆啲踢，我哋之前菁英盃對理文都畀佢踢正選，佢嗰場好緊張，今場佢冇怯場，亦證明都我哋教練團做嘅嘢無白費。希望佢可以繼續踢得好，佢係一個好特別嘅球員，始終香港比較少創造型球員。」