總結：2020年湖人夢幻陣容曝光
20190130
東網電視
更多新聞短片
勒邦占士(右)可能喺湖人建立夢幻陣容。(互聯網)
湖人喺NBA主場以105:121不敵76人，雖然勒邦占士未能夠傷愈復出拯救球隊，不過美國傳媒透露，艾榮有可能認衰轉會湖人，投靠大帝再爭總冠軍，仲有人將2020年湖人嘅潛在夢幻陣容曝光添！
其實占士喺開波前有熱身，自上個月腹股溝拉傷後，首次參與賽前練習，但消息話湖人考慮用波爾、古斯馬、蘇巴斯同選秀權，交換塘鵝嘅安東尼戴維斯，軍心難免不穩，結果艾賓特有28分、11個籃板同6次助攻，協助76人贏波。
除咗安東尼戴維斯主動提出交易申請，有意加盟湖人，艾榮最近同塞爾特人隊友不和，仲曾經公開向占士道歉，承認兩年前唔應該同佢反面離開騎士。知情人士話，現時艾榮好清楚做領袖唔易，的確有計劃再同大帝聯手。
另外，據講湖人對勇士嘅奇利湯臣同速龍嘅李安納都好有興趣，或者要簽晒4個全明星球員，交易操作上有好大難度，不過湖人當初氹到大帝君臨，肯定有協助佢爭總冠軍嘅大計，球迷都好期待，打機式陣容會喺現實中出現。
同日，火箭喺主場以116:121不敵塘鵝，占士夏登取得37分、11個籃板同6次助攻，個人連續24場得分30＋，可惜基斯保羅狀態未回復得10分、4個籃板同9次助攻，導致火箭一度領先15分下，輸畀有安東尼戴維斯繼續養傷嘅塘鵝結束3連勝。
最新賽果(左方主場)
騎士 116:113 巫師
活塞 105:115 公鹿
魔術 117:126 雷霆
籃網 122:117 公牛
火箭 116:121 塘鵝
馬刺 126:124 太陽
湖人 105:121 76人
支持本地運動員，一齊去「睇體」！
東網體育FB同你追實體壇每個精彩時刻！