【曼狗年結】曼聯復甦並非蘇斯克查功勞
20190204
東網電視
更多新聞短片
(Getty Images)
自從費格遜退休之後，曼聯無論由費Sir欽點嘅蘇格蘭鄉里莫耶斯接手，亦或由頂級名帥尹戈爾、摩連奴執教，成績都令人失望，偏偏由只教過莫迪同卡迪夫城嘅蘇斯克查領軍，卻脫胎換骨，莫非「蘇B」教波功力真係咁犀利，定係佢熟悉曼聯文化，容易上手？其實真正原因係4大巧合。
首先，蘇斯克查接手領軍時間非常好，避過晒上年11、12月最難踢嘅賽程，包括英超鬥曼城、阿仙奴、利物浦，亦唔需要兼顧歐聯戰線。
反觀，佢第1場波對手只係卡迪夫城，之後對哈特斯菲爾德、般尼茅夫、紐卡素，英足盃鬥雷丁。第一個考驗先至係對熱刺，當時曼聯已經打番起信心。
第二，蘇斯克查領軍咁得心應手，據悉多得費格遜背後輔助畀意見，點解費Sir之前又唔幫其他主帥呢？因為一來佢真心想退休放手，二來莫耶斯、尹戈爾、摩連奴都係資深主帥，唔使費Sir教佢哋做嘢。
加上費Sir有一段時間中風休息，近期先至康復，可以出番來主持大局，「蘇B」有師傅教路，梗係掂啦。
第三，經過莫耶斯、尹戈爾、摩連奴合共超過5年經營，先後簽入唔少優質球員，令「蘇B」一上任已有好牌用，加上3人過去嘅「失敗經驗」，令「蘇B」可以避免重覆犯錯。
最後，蘇斯克查回巢之後，主要勁敵紛紛走下坡，特別係車路士、阿仙奴狂失分，令紅魔鬼打入前4重燃希望。更不可思異係曼聯嘅歐聯對手巴黎聖日耳，近日都出事，先係尼馬受傷，跟住上場法甲仲被打破聯賽不敗之身，狀態似下滑，莫非連個天都要幫蘇斯克查創造奇迹？
支持本地運動員，一齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！