數據唔呃你！今鋪美斯完勝C朗喎！
20190204
東網電視
更多新聞短片
(Getty Images)
雖然話人比人，比死人，不過好似當今兩大球會美斯同基斯坦奴朗拿度，根本就係命中宿敵！兩位5屆世界足球先生以前喺西甲鬥餐死，以為今季C朗去咗意甲，不過一樣有傳媒拎佢哋嚟做比較。結果從數據睇，發現戰果同上季不變，阿根廷球王美斯又一次完勝葡萄牙球王C朗，大家又點睇呢個結果呢？
單睇今季，美斯已經入咗29球，而C朗只係得17個「士哥」。美斯另加14個助攻同89次關鍵傳送，C朗就慘慘豬只得7助攻同44次關鍵傳送。去到盤球推進，31歲嘅美斯有96次，33歲嘅C朗就只得33次，輸成條街囉。最後，美斯仲攞咗13次最佳球員獎，而C朗就只得7次，唔好唔記得，季初美斯仲曾經因傷抖咗3周，可以話係有多少讓賽，唯一C朗贏嘅，就只有佢幫「祖記」贏咗個意大利超級盃囉，不過點計呢鋪C朗都係輸得好徹底喎！
當然，唔少C朗球迷一定會幫口，話C朗新轉意甲要適應，同埋意甲出名防守勁，特別難踢，呢兩點都絕冇講錯，不過最慘係睇埋上季二人喺西甲數據，都一樣係美斯完勝喎！好似美斯上季入34球、助攻12次、87次關鍵傳送，而C朗就只入26球、5次助攻、38次關鍵傳送。另外美斯有185次帶波同22次最佳球員獎，C朗就只有31次帶波同7次最佳球員，唯一解釋係上季皇馬好早放棄西甲，專注歐聯啦！
當然，講到底，睇一個球員有幾勁，唔可以單睇數據嘅，反正美斯同C朗就係當今兩大球會，大家都係把握機會睇多啲佢哋嘅好波好過啦！
東網體育FB同你追實體壇每個精彩時刻！
支持本地運動員，一齊去「睇體」！