返老還童 壽星仔C朗身體更勝20歲
20190206
東網電視
更多新聞短片
(Getty Images)
葡萄牙球王基斯坦奴朗拿度尋日周二踏入34歲，認真可喜可賀！更加令人戥佢高興，原來根據一份最新由祖雲達斯為佢做嘅身體報告，證實佢雖然年紀唔輕，但身體狀態竟出現反老還童情況，就係話依家佢副Body，竟然可以媲美20歲嘅職業足球員，點到你唔服呀！
根據份報告，C朗依家個體脂比率係7%，而肌肉質量係50%，根本係完全拋甩晒同齡組別嘅其他足球員。至於佢喺舊年世界盃跑出全個賽事最快嘅時速33.98公里，雖然年紀不斷大，但C朗根本係逆齡再生，堅到你唔信。
查實當C朗加盟祖記之前，皇馬都曾經同佢身體做過研究比較，就話佢副偈拍埋23歲嘅職業足球員都完全唔輸蝕。只係今次做報告比較嘅媒體，就拎C朗數據同20歲足球員去比較，結果更加恐怖嘅情況發生，就係C朗根本係完全帶出，好似體脂比率7%，就遠勝其他足球員平均嘅10至11%；肌肉質量50%又係靠平均數46%優勝。
唔係講笑，C朗淨係舊年踢歐聯代表皇馬對祖記射入嘅經典倒掛世界波，當時佢就跳到2.3米高，而根據外地媒體所講，呢種倒掛射門，原來C朗根本喺皇馬操練中每日都會去做。總之一句，C朗能夠逆齡再生，係同佢真係夠晒專業去保養同練習有關，絕無符碌！
東網體育FB同你追實體壇每個精彩時刻！
支持本地運動員，一齊去「睇體」！