總結:勒邦占士唔使再初四咁嘅樣

20190208
東網電視
更多新聞短片
勒邦占士喺明星賽揀到心水隊友。(互聯網)
湖人喺NBA作客以129:128險勝塞爾特人,終止連輸2場走勢,而且勒邦占士喺明星賽分隊揀人中,選到佢嘅絕對心水陣容,傳聞未來會同佢做隊友嘅艾榮、李安納、安東尼戴維斯同奇利湯臣全部畀佢揀晒,今次占士唔使再初四咁嘅樣!
上半場湖人落後,到第3節,占士開啟進攻模式,最後佢全場有28分、12個籃板同12次助攻嘅3雙數據,加上朗度倒戈有17分、7個籃板同10次助攻,包括完場前搶到籃板射入絕殺中距離,協助湖人贏波,完場後大帝第一時間衝埋去慶祝。
傳聞湖人喺2020年會完成夢幻陣容,簽晒艾榮、李安納、安東尼戴維斯同奇利湯臣,唔知係咪有心,占士喺明星賽揀晒佢哋入隊,令人懷疑湖人真係有羅致佢哋嘅打算。另外,大帝嘅首選係傳過有興趣去湖人嘅杜蘭特,睇落佢唔似揀人打明星賽咁簡單。
同日,速龍作客以119:101擊敗鷹隊,雖然李安納休息,但路維有13分、8個籃板同13次助攻嘅全面數據,帶領球隊3連勝,而且速龍喺交易截止日前簽到灰熊嘅馬克加素。相反,林書豪後備上陣17分鐘得4分、1個籃板同2次助攻,當然阻唔到鷹隊2連勝結束。
明星賽分隊名單
勒邦占士隊:杜蘭特、艾榮、李安納、占士夏登、安東尼戴維斯、奇利湯臣、列拿特、施蒙斯、艾迪列治、唐斯、比爾、韋迪
安迪杜甘普隊:史堤芬居里、艾賓特、保羅佐治、甘巴獲加、米度列頓、祖傑、韋斯布克、格芬、迪安捷奴羅素、胡斯域、路維、魯域斯基
最新賽果(左方主場)
溜馬 116:92 快艇
魔術 122:112 木狼
鷹隊 101:119 速龍
塞爾特人 128:129 湖人
雷霆 117:95 灰熊
拓荒者 127:118 馬刺
支持本地運動員,一齊去「睇體」!
東網體育FB同你追實體壇每個精彩時刻!