盡情愚弄我吧！莫拉達演繹1個累全家
20190210
東網電視
更多新聞短片
艾華路莫拉達被球迷形容係黑腳。(Getty Images)
馬德里體育會喺西甲主場以1:3不敵皇家馬德里，艾華路莫拉達倒戈出戰唔止食詐胡，佢轉會後踢咗兩場聯賽，仲累到原本連續18場聯賽不敗嘅馬體會連輸兩場，極級黑腳，搞到網民笑佢完美演繹1個累全家。
開波16分鐘，卡斯米路接應角球倒掛射入先開紀錄，雖然9分鐘後，基沙文單刀為馬體會扳平，不過完半場前，沙治奧拉莫斯射入12碼為皇馬再領先。74分鐘，加里夫巴利窄位射入拉開比數，加上湯馬士柏迪喺6分鐘後兩黃一紅被逐，注定馬體會輸波。
賽後馬體會被皇馬壓過，落後對方1分失去聯賽榜第2位，而且球迷最難受嘅係，莫拉達喺換邊後9分鐘，曾經單刀挑射入網，點知球證睇完VAR話佢越位在先，判入球無效，結果佢加盟後上陣161分鐘冇波入，連累球隊2連敗。
要知道莫拉達加盟前，馬體會連續18場聯賽未輸過，依家突然連輸兩場，網友自然覺得佢有神奇力量。賽後皇馬隊長沙治奧拉莫斯仲喺Instagram玩嘢，Like咗張改圖寸馬體會，內容係佢抱住個馬體會BB，餵奶畀對方飲，意思係馬體會未戒奶呀！
支持本地運動員，一齊去「睇體」！
東網體育FB同你追實體壇每個精彩時刻！