亞冠盃　朱Sir向好友陳清和收好料

傑志谷到行挑戰霹靂！代表香港出戰亞冠的傑志，將於香港時間今晚9時在亞冠盃外圍賽第二圈登場，作客硬撼馬來西亞球隊霹靂。昨晚傑志進行賽前最後一課操練時，傷兵列斯奧不惜紮住上，疑似「暈機浪」的鄭展龍亦跟足全課，務求全隊上下能以最佳狀態，迎接這場生死大戰。

今輪賽事若法定時間打和會加時30分鐘，再和就要互射12碼決勝負。勝方會躋身下一圈，再出征韓職蔚山現代爭逐分組賽資格。由於屬「一場過定生死」的關鍵之戰，傑志上下都嚴陣以待，從昨晚操練所見，日前弄傷左邊肩膊及手臂的列斯奧，都紮住受傷部位隨隊操練，而早前感到不適的鄭展龍亦有完成整課操練。

「藍鳥」主教練朱志光透露，他除了早前向好友兼馬來西亞國家隊主教練陳清和「收料」，獲得不少有關當地的足球資訊外，自己本身都與該國甚有淵源︰「佢哋（馬來西亞國家隊）嘅主教練陳清和同我係好好朋友，所以一直都對佢哋嘅足球發展同理念都有所了解。最重要係我太太係馬來西亞人，所以對呢度都比較熟悉。」

球場較闊唔會鹵莽進攻

對於這場大戰，「朱Sir」強調球員要冷靜應付，同時在體力留放方面要做得更好︰「呢個主場比香港嘅球場闊，兩邊嘅空位會好大，如果鹵莽咁攻上去，會畀咗空位對手，佢哋啲球員好有速度，我會同啲隊友講要小心啲，一旦控制唔到戰況就會自亂陣腳而輸波。」

另一邊廂，霹靂是亞冠盃「新丁」，實力卻不容忽視，主教練杜拉高域稱球員對首登亞冠大舞台感到興奮，他又讚傑志除了是港超冠軍外，亦具有豐富的亞洲賽經驗，明言今仗將是不易應付，但球隊已準備就緒，希望能以出色表現爭取贏波晉級。

首戰亞洲賽盧卡斯大無畏！

去季因傷無法代表傑志出戰亞冠盃的巴西前鋒盧卡斯，對於首次踏上亞洲賽舞台感到期待和興奮︰「好開心可以首次代表球隊踢亞洲賽，同時亦對呢場波充滿信心，我希望可以協助隊友贏波。呢度天氣對我哋影響唔算好大，始終香港都好熱，我哋亦有一班好球員，所以問題不大。上季喺科蘭身上學咗好多嘢，不過已成過去，依家我有機會挑戰亞冠盃舞台，期望幫到球隊贏波，傑志目標係打入分組賽。」

盧卡斯又表示並未感到緊張，亦清楚自己在場上的工作︰「我認為前鋒對每支球隊嚟講都好重要，今場我會恃自己嘅身形去『Hold波』，當然有機會的話都要爭取入球。我喺巴西打過唔少重要比賽，所以唔會緊張，只係對呢場波好期待，一班隊友都好有經驗，希望好好去享受呢場比賽。」