總結:新超級球隊組合ing!杜蘭特+艾榮

20190220
東網電視
更多新聞短片
杜蘭特(左)同艾榮有可能喺紐約人合作。(互聯網)
2019年NBA明星賽,幾乎變成球星招攬拍檔嘅非公開活動,除咗勒邦占士同安東尼戴維斯公開握手令人好多嘢諗,比爾更直接承認有借機會搵人,美國傳媒仲話,杜蘭特同艾榮有可能去紐約人,合組新超級球隊添!
傳聞杜蘭特幫到勇士再拎總冠軍嘅話,就會玩夠喺今個夏天離隊,由於佢講過,冇乜超級球星鍾意同勒邦占士合作,所以佢去湖人嘅機會唔大,相反紐約人喺季票廣告中,曾經踩界暗示可能簽到KD,最新報道話艾榮會跟埋去幫手。
明星賽開始前,傳媒發現佢兩個喺熱身期間玩單挑,有講有笑,艾榮被封阻後仲攤喺地唔願起身,搞到網友覺得有Hehe嘅感覺。到比賽開始,佢兩個又喺後備席坐埋一齊,最後杜蘭特當選MVP,艾榮仲第一時間趷高摸對方個頭祝賀。
咁都唔止,KD領獎後竟然回身,當眾捏艾榮奶頭,旁邊嘅李安納同路維睇到呆晒。消息話兩大球星喺休季嘅時候,都有約埋去P同訓練,今次打完明星賽,佢哋孖住去邁阿密行街,仲畀網民影埋相,或者真係有組隊嘅打算都未定。
支持本地運動員,一齊去「睇體」!
東網體育FB同你追實體壇每個精彩時刻!