菁英盃　佳聯元朗「國王」候命鍊夢想ＦＣ

「菁英盃」最後一輪賽事，周六(2日)假青衣運動場上演「雙料娛樂」，頭場下午2時30分由冠忠南區火併凱景，尾場5時正開賽，由已提早出線的夢想FC硬撼佳聯元朗，兩支地區球隊主帥均表示，無論出線形勢如何，都會做好本分，在最後一場分組賽盡力全取3分！

以3戰7分暫居菁英盃A組榜首的夢想FC，上場分組賽跟東方龍獅打成0比0後，已率先奪得4強席位。主教練梁志榮透露，今仗期望可以派較多年輕球員上陣︰「我計劃今場畀多過兩位U22球員落場，目前仲係諗緊，想畀最少4位適齡球員上陣。另外都希望可以畀小部分主力休息，始終過去呢兩個月賽程比較密，唔想有球員出現損耗嘅情況。」

佳聯元朗目前3戰得6分，在昨晚富力R&F擊敗和富大埔後，今仗必須全取3分才可進身4強，主教練郭嘉諾明言：「我哋絕對想贏波，好多年輕球員愈踢愈好，值得有多啲機會，所以一定會搏！」他又指：「今場波唔易踢，始終青衣係夢想嘅主場，所以我哋要打醒十二分精神！不過我哋有部分球員受傷、有牌，之後兩場聯賽對凱景、理文都好重要，唔想再有任何受傷、停賽嘅情況出現，所以都要攞番個平衡。」球隊日前宣布簽下前鋒「國王」卓耀國，「郭Sir」指「阿國」渴望表現自己，但不會急於起用他，期望「阿國」準備好後能在重要時刻貢獻球隊。