菁英盃　理文傑志晉級生死鬥

今日菁英盃上演B組生死戰，理文與傑志相逢在將軍澳運動場。由於同組冠忠南區昨日全取3分，意味今仗和波的話雙方只會「攬炒」出局，相反獲勝一方則可以次席闖4強！（周日下午5時30分開賽）

視菁英盃為重要目標的理文，季內兩鬥傑志均落敗而回，主教練陳曉明認為球隊要取得更好平衡：「季中之後我哋進攻、入球能力好咗，但同時間後防空位亦多咗，今場我哋一定要贏，所以要喺攻守平衡方面做得更好！」上輪聯賽對陣冠忠南區，理文雖以1比3落敗，但「陳Sir」揚言士氣未受影響，惟傷兵問題依舊，目前史提芬彭利拿、梁嘉恆、袁皓俊仍有傷在身，現時只得尼迪利一位中鋒「孭飛」，「陳Sir」表示：「其實佢喺前場製造好多機會，佢嚟到香港都估唔到自己有咁多球中柱，不過佢好有信心今場可以入波！」

朱志光：球隊信心十足

現排B組第4位的傑志，只要今仗全取3分，便可憑較佳得失球壓過冠忠南區取得小組次名，惟主教練朱志光透露，球隊目前同樣受傷兵潮困擾，傷兵包括列斯奧、艾里奧及林恩許，唐建文亦有微傷，幸好球隊上仗大勝香港飛馬後信心大增︰「上場比賽球員落到場維持住一個好好嘅心態，對住近況極佳嘅飛馬都贏到波，對球員嚟講係增添咗好多信心。嚟緊球隊嘅賽程都比較緊密，所以隊中一啲未係十足狀態嘅球員，都唔敢畀佢哋落場搏住，要等佢哋練番足先至落場，咁樣會比較穩陣。」「朱Sir」續道︰「其實我哋今年喺陣容上，都喺一啲重要比賽上畀新面孔上場，佢哋亦達到一定要求，希望佢哋可以保持落去，畀到新鮮感同衝擊畀球隊。」