總結：慘輸洛城打吡 湖人迷要高比拯救
20190305
東網電視
更多新聞短片
(法新社圖片)
湖人球迷要高比唔要占士？老牌勁旅洛杉磯湖人今朝喺洛城打吡主場不敵同市宿敵快艇105比113，湖人打到尾段潰不成軍，連主場球迷都不斷對佢哋發出嗟聲，更加估唔到嘅係部份球迷更加高呼「我哋要高比」，唔知「大帝」勒邦占士有冇諗過自己喺度會搞成咁呢？
唔係話占士唔搏命，佢今場打咗42分鐘，但全場19射9中，3分波就只得6中1，全場都攞到27分8籃板同6助攻，只係關鍵時刻去到第4節就頻頻失手。至於佢隊友朗度亦拎到湖人生涯首次「三雙」24分10籃板同12助攻，新仔祖殊赫利全場跑到足嘅拚搏精神一樣係人人讚，不過湖人尾段畀快艇甩開，最後輸波，就連主場球迷極度失望囉！
輸埋呢場之後，湖人由2月起到依家，錄得3勝9負差劣走勢，家陣佢哋距離第8位馬刺都有5.5場，同死敵快艇更加相差6場。另外，由於湖人今季同快艇交手戰績係1勝2負，令到佢哋就算喺剩番18場常規賽可以追番6場勝差，但都唔會騎得住快艇，有傳媒甚至已經批死湖人今季玩完，季後賽無望添！
此外，除咗之前音樂人Snoop Dogg話要用5美金賣走自己將包箱季票之外，網站《湖人國度》就寫住：「唔努力，就冇季後賽！」另外亦有網站鬧爆湖人根本欠缺團結性，已經成為一個笑話。事實上，湖人球迷今次講得出想高比回歸，其實最鍾意都係睇到佢嗰種永不放棄精神，相反依家「紫金兵團」好似未打先輸，作為球迷點會唔心痛吖！
最新賽果(左方主場)
籃網 127:88 獨行俠
熱火 114:113 鷹隊
馬刺 104:103 金塊
太陽 114:105 公鹿
爵士 112:115 塘鵝
帝王 115:108 紐約人
湖人 105:113 快艇
Follow東網體育IG一齊撐本地運動員！
東網體育FB同你追實體壇每個精彩時刻！
支持本地運動員，一齊去「睇體」！