【有片】主場變泳池 聖保羅甘過傑志

20190310
東網電視
更多新聞短片
經歷去年9月中受颱風「山竹」吹襲,耗時半年修葺嘅賽馬會傑志中心重開,但係地球嘅另一邊又發生自然災害,巴甲名門聖保羅慘被水淹,Morumbi主場以至對公眾開放嘅活動場地成為澤國,需要至少關閉1個月,連下星期對彭美拉斯一場省聯賽大戰,都要另覓地點做主場。星期日朝早8點場巴省聯聖保羅主場對費路維拉亞,已經改咗喺帕卡恩布體育場舉行,結果「無家可歸」嘅聖保羅,只能夠1比1和波。
上星期聖保羅市豪雨成災,街道全變急流,大量洪水湧入聖保羅嘅大本營,搞到更衣室亦被沖毀,一片狼藉。聖保羅會方事後透露,主場被迫關閉1個月,以便清潔和維修積水地區。由於工程需時,本月16號巴西聖保羅省聯賽重頭戲──聖保羅主場迎戰彭美拉斯,焗住要揾過另一個地方上演,搞到佢哋冇埋地利。
為咗化解危機,聖保羅馬上再推「幫助聖保羅足球俱樂部變得更強大」嘅活動,呼籲球迷畀錢入會,提供預定門票有折扣優惠、到認可專賣店購物可獲高達40%折扣、同球員食晚飯、玩遊戲之類嘅獨家福利,希望吸納資金幫補一下維修費。
支持本地運動員,一齊去「睇體」!
東網體育FB同你追實體壇每個精彩時刻!