【東體爭議】阿當莊臣今日放監 進軍中超?

20190322
東網電視
更多新聞短片
前英格蘭國腳阿當莊臣,3年前「衰十一」(與未成年少女發生性行為)被判監6年,經過3年嘅牢獄生涯之後,英國傳媒報道佢周五將會提前獲釋,佢爸爸兼經理人周四已經為佢做出獄準備。依家只係31歲嘅阿當莊臣,仍然希望可以延續足球生涯,雖然再踢英超已經冇可能,而英格蘭各級聯賽球會對請佢亦有顧忌,不過阿當莊臣就計劃出國搵食,中超更加係佢目標落腳地之一!
阿當莊臣早就為放監後生活做準備,包括斥200萬鎊買入一間7房兼有泳池嘅豪宅,消息人士透露,呢位前新特蘭球星唔會放棄踢波,但佢自知喺英國球壇已無立足之地,所以目標係去中國、中東地區或者土耳其搵食。據報阿當莊臣喺獄中都有踢波,仲係一支由「性罪犯」組成嘅足球隊主力。
不過,阿當莊臣去中超嘅計劃未必能夠實現,英國《每日郵報》報道,佢哋聯絡過所有英甲同英乙球隊,全部回覆無意招攬阿當莊臣,報道同時指出中國簽證非常嚴格,尤其係有刑事紀錄嘅更加唔使旨意去打工,威爾斯教練高文執教嘅河北華夏幸福就率先回應,因為阿當莊臣有犯罪紀錄,所以唔會向佢招手。
阿當莊臣3年前被指同1個15歲女球迷發生性行為,被捕後佢承認「與兒童發生性行為」及「兒童性誘拐」兩罪被判監6年,而且阿當莊臣犯案嗰陣,當時女友Stacey先至為佢生咗個囡囡冇幾耐,依家兩人已經分手。阿當莊臣犯下大錯,但佢已經接受咗懲罰,大家覺得佢係咪應該有機會改過自新呢?
東網體育FB同你追實體壇每個精彩時刻!
支持本地運動員,一齊去「睇體」!