現實版戴志偉!久保建英6‧4後升大國腳!

20190328
東網電視
更多新聞短片
現實生活終於出現南葛呢隊波,咁會唔會有埋《足球小將》嘅戴志偉(大空翼)呢?可能有!嗰個就係未夠18歲嘅巴塞產品、FC東京中場久保建英,一個6月份好大機會升做日本大國腳,參加美洲國家盃嘅未來之星!
身兼日本國家隊、奧運隊主帥嘅森保一,前日喺兵庫縣受訪時暗示,6月4日18歲生日嘅久保建英,可能獲得徵召,出戰6月5日嘅成年隊A級國際賽──麒麟盃。由於久保係明年東京奧運嘅熱門人選,為咗長遠培育新人,「藍武士」獲邀出戰6月14日開打嘅美洲國家盃,佢亦可能會入選隨軍。
被認為日本史上最高水準嘅足球天才久保建英,2001年6月4日生於川崎市。2011年加入巴塞少年隊,喺拉馬西亞受訓,成家人仲搬去西班牙居住,佢爸爸久保健史更專門出過一本書,講述點樣培養囝囝添。話時話,久保健史畢業於築波大學體育系,曾經教過少年隊,對久保建英嘅成長確實好有幫助。
2015年因巴塞被國際足協查出違規簽入未成年海外球員,久保建英焗住返日轉投FC東京U15,好彩對佢嘅發展冇乜影響。翌年久保建英以15歲之齡跳級踢U18,同年11月再升上FC東京U23,參加日丙創下J聯賽史上最年少出場紀錄(15歲5個月零1日)。17年4月15歲10個月零11日,成為最年少入球球員,同年11月又升上一隊,升級速度快過坐火箭。
身高1.73米、體重67公斤嘅久保,去年8月外借横濱水手,上季喺日職為東京、横濱共上陣9場入1球,今季回歸FC東京,新球季場場打正選。久保仲係2017年U17、U20日本世青盃代表。
由於日職對初出道年輕球員嘅人工,有一套嚴格嘅標準,久保建英簽咗職業A合約冇耐,年薪頂龍得700萬日圓(約49.7萬港元),但係「日本美斯」名氣咁大,依家已經開始接拍廣告,收入當然唔只紙面上咁少,尤其當佢滿18歲可以到外國揾食,嗰條數可以大到乜嘢地步冇人估到。