【有片】伊巴蠍子靚射 朗尼入零角度罰球！
20190401
東網電視
更多新聞短片
（互聯網）
兩位前曼聯超級球星，去到美職仲係超勁，呢到花旗足球全面升Level！今輪美職伊巴謙莫域梅開二度，一手帶領洛杉磯銀河殺敗波特蘭伐木者，呢位38歲瑞典戰神全場超Fit，最犀利使出功夫腳蠍子擺尾靚射，最後中柱勁唔好彩。另一邊廂朗尼亦都叻仔，喺角球點附近扯入超級罰球，無論你係咪曼聯球迷，都會睇到呆晒！
今季美職開打冇耐，銀河隊長伊巴謙莫域超晒班，雖然已經38歲，不過落到場仲係揮灑自如。今戰佢接應隊友右路傳中，喺敵衞力壓下背對龍門舉起右腳使出蠍子擺尾絕招，個波直飛向門將右手邊，可惜中柱彈出。呢次唔入唔緊要，勁活躍嘅佢兩度博得12碼，親自操刀全部射入，銀河最後贏2:1，伊巴成為贏波最大功臣。
朗尼亦繼續喺美職發光發熱，華盛頓聯隊作客奧蘭多城，朗尼於左路近角球旗附近博到罰球，呢位前英格蘭隊長使出黃金右腳落腳趾公西，個波直彎遠柱入網，帶領球隊贏2:1，巨星功架仲喺度呀！
東網體育FB同你追實體壇每個精彩時刻！
支持本地運動員，一齊去「睇體」！