雲格險簽系列 竟然仲有利物浦呢條煙
20190405
東網電視
更多新聞短片
(Getty Images)
前阿仙奴名帥雲格領軍功夫好，曾經帶領「兵工廠」贏得唔少錦標，一直令球迷津津樂道。不過，「教授」另一樣令人難以忘懷嘅，一定係佢買人嘅險簽系列。一向理財有方，每次買人都計過度過嘅佢，領軍生涯往往因為嫌人身價太貴，錯過咗唔少頂級球員，而最新加入「教授」呢個險簽系列，竟然係依家喺利物浦踢到曉飛嘅前線三條煙之一嘅沙迪奧文尼喎，阿仙奴球迷係咪好激氣呢？
呢位依家人氣勁爆嘅塞內加爾國腳，近排有傳連皇馬都想將佢收歸旗下，盛傳佢身價達到1億鎊，不過如果話你知，喺2012年，雲格曾經有機會以400萬鎊將佢買入，只係「雲爺爺」最終嫌貴，「兵工廠」先同呢位球星擦身而過。
依家先得26歲嘅文尼，2016年以3,400萬鎊由修咸頓加盟利物浦，今季已經射入17球，令到「紅軍」仲喺爭標行列同曼城激鬥。文尼嘅恩師文迪托尼近日受訪提番起有關呢位塞內加爾球星嘅往事。文迪托尼話阿仙奴本來可以勁平價錢簽到文尼，但最終佢哋嫌貴，然後文尼唯有以360萬鎊轉投奧地利嘅薩爾斯堡。
文迪托尼話:「係阿仙奴喺2012年拒絕簽入沙迪奧文尼，仲記得當年佢踢完奧運，我向阿仙奴喺法國嘅球探基文迪推介，當時文尼仲踢緊口啱啱降落法丙嘅梅斯，但基文迪唔聽我建議。幾年之後，當時雲格仲係阿仙奴領隊，我都有同佢提起過件事。」睇番雲格個險簽系列，包括美斯、C朗同伊巴謙莫域都有份，文尼呢次都幾威喎！
支持本地運動員，一齊去「睇體」！
東網體育FB同你追實體壇每個精彩時刻！