奧運外　世界排名34又點？港女挑戰越南

周三（3日）在「2020東京奧運女子足球亞洲區外圍賽第二圈」首場賽事，賽和勁旅約旦0比0的香港女子代表隊，周六（6日）香港時間下午6時會再度登場，面對首仗以2比1力克東道主烏茲別克、世界排名34位的越南。硬仗當前，港隊主將張煒琪表示會與隊友一起做好防守，務求在賽事中把握到一個機會，為支持者帶來好消息。

對於能夠在首仗賽和世界排名54位的約旦，張煒琪坦言全隊上下仿如打了一支強心針，若非完場前未能將機會轉化成入球，港隊應該不止取得和波1分。「對約旦場波球隊喺防守方面做得好好，冇輕易畀對方進攻成功，反而前場方面，我覺得自己未能發揮得最好。」張煒琪補充謂：「對越南其實同對南韓、中國冇乜分別，都係會以防守為主，做好咗防守先，再睇下有冇一個機會去進攻，唔會諗太多，集中保護個波先。」

主帥列卡度在球隊賽和約旦後，於社交平台留言，表示獲球員的表現感到自豪，希望大家可以繼續努力，傾盡全力去踢好餘下兩仗。