港超聯　凱景和富大埔為3分 搶錢咁搶！

「中銀人壽香港超級聯賽」周日（7日）下午上演兩場好戲，頭場下午2時30分假深水埗運動場主場出擊的凱景，迎戰剛於上周中的亞協盃賽事贏波的和富大埔，兩隊分別為護級和爭標而力爭3分；至於尾場賽事則下午5時30分於元朗大球場舉行，由佳聯元朗及香港飛馬合演「3連對」的「次回合」，雙方13日（周六）爭奪「菁英盃」決賽席位前，先於聯賽碰頭。

坐擁主場之利的凱景，目前仍需為護級努力，今仗面對「綠戰士」，主教練馮凱文期望：「大埔今季各方面都比我哋強，不過佢哋周中踢完亞協盃，希望藉著主場同體力嘅優勢，可以喺今場搶到分。」凱景自上輪聯賽對東方龍獅後，已超過兩周沒有比賽，「馮Sir」表示：「呢段時間我哋有約友誼賽去保持球員狀態，同時間亦都畀我哋嘅傷兵有時間去休養，特別係隊長杜瑋鴻、許嘉樂都已經復操。不過孫銘謙踢完港隊返嚟有傷，唔可以操練住，而原本諗住畀佢踢先嘅李啓智，之前喺練波嘅時候受傷，提早收咧，所以今場波喺排陣方面都有啲頭痕。」另外，許嘉樂、羅拔因停賽依然未能披甲。

和富大埔早前於「足總盃」8強遭夢想FC戰至加時階段以2比1淘汰後，上周三（3日）出戰「亞協盃」分組賽與傑志合演「香港打吡」，最終以4比2全取3分。「綠戰士」主帥李志堅表示，球隊在贏波後重拾信心︰「其實球隊只要一贏番波，球員都會有番信心，我會覺得喺呢個時刻係非常關鍵。每一日每場波都有好多變化，例如有球員受傷等等，而心態亦都好緊要，態度會決定好多嘢。我哋依家係要知道，大家都要去盡每一分力，而我覺得我哋嘅球員係能夠做到呢一點。」至於上仗因傷退下火線的李家豪及翟廷峯，前者因足踝扭傷而缺陣，後者則因為在比賽期間感到不適而被換走，相信今仗可繼續上陣。