冇錢冇人英乙創奇蹟 阿仙奴搵佢教啦！
20190410
東網電視
更多新聞短片
(Getty Images)
英超阿仙奴今季由艾美利帶隊，不過成績都唔算突出，家陣喺英超爭前4又落入下風，歐霸爭標都仲要努力，查實名帥雲格離隊之後，究竟搵邊個接手先可以帶番起隊波？艾美利係咪理想人選？抑或係呢個帶隊英乙馬爾斯菲逃出降班區嘅領隊，身為阿仙奴名將，先係未來「兵工廠」揸Fit人呢？
曼聯今季中喺舊將蘇斯克查接手之後，成績反彈，雖然仲未完全走出低谷，但至少已經贏得各界讚賞同信任。查實阿仙奴一樣有名將可信，呢個就係球隊經典中堅蘇甘保。呢位前英格蘭國腳中堅舊年11月踏出佢領隊生涯第一步，就係喺英乙接掌馬爾斯菲，當時呢支新升班球隊以2勝4和13負得10分排包尾，人人都睇死佢哋係降班膽。
更加大鑊嘅係，馬爾斯菲嚟到今年1至3月連續3個月都出現拖糧情況，當時所有一隊成員就搞咗次隊內投票，決定係去罷操定罷賽，希望向管理層施壓，而最終只有11名球員肯繼續練波。
雖然大環境惡劣，不過蘇甘保領軍成績反而唔錯，啱啱一輪佢哋就將前列份子埃克塞特打低，贏3比2。馬爾斯菲近5輪聯賽取得2勝3和不敗成績，球隊喺英乙聯賽榜已經爬到上尾三位置，即係脫離英乙只得兩席嘅降班區。雖然話家陣馬爾斯菲只係較護級安全線多2分，但考慮到佢哋喺冇糧出同冇人練波之下，都有成績改善，可以逃離絕境。蘇甘保領軍似乎堅有一手，或者當艾美利真係出事，阿仙奴真係可以諗諗佢喎！
支持本地運動員，一齊去「睇體」！
東網體育FB同你追實體壇每個精彩時刻！