一剔勢簽利物浦 贊助費將超越曼聯！
20190412
東網電視
更多新聞短片
利物浦NIKE波衫網上設計圖。（互聯網）
利物浦同New Balance嘅波衫合約，將於19/20年球季尾結束，雖然仲有超過1年時間，但已掀起爭奪戰，Adidas、Puma同NIKE都有意搶利物浦呢個客仔，據報NIKE極有可能成為最終勝利者。據《ESPN》報道，利物浦認為球會市場價值唔輸畀曼聯，故新波衫贊助合約，金額勢將超過7.5億鎊。
紅軍目前同New Balance嘅合約，金額為4500萬鎊1年，約中講明New Balance如可追上其他贊助商嘅價錢，將有「優先續約權」。利物浦近年表現大有改善，打入上屆歐聯決賽後，今季又有機會爭英超、歐聯冠軍，市場價值愈來愈大，所以球會勢將追求天價贊助合約。將於季尾同曼城結束合約關係嘅NIKE，對利物浦志在必得，《ESPN》表示紅軍同「一剔牌」傾得最深入，後者希望盡快同紅軍落實合作關係。
Adidas同曼聯嘅波衫贊助合約，10年總值7.5億鎊，係目前英格蘭球壇金額最高合約；而18年巴塞同NIKE簽下10年10億鎊嘅贊助合同，則係全球最高（第2位係皇馬，10年9.8億鎊）。以目前利物浦嘅號召力同卡士，雖然難追巴塞、皇馬，但合約金額勢將超越曼聯。
東網體育FB同你追實體壇每個精彩時刻！
支持本地運動員，一齊去「睇體」！