籃球界莎賓娜 Alanna靚絕WNBA選秀會

20190412
東網電視
更多新聞短片
(互聯網)
排球界有莎賓娜、網球界有舒拉寶娃,但講到籃球界靚女,數嚟數去都好似諗唔到喎。梗係啦,因為打得職業籃球,而又真係勁嗰啲,冇番咁上下噸位都幾難出頭,講真一個女仔去到呢個磅數高度,要外表好出眾,唔係易事囉。
但日前WNBA美國女子職業籃球聯賽選秀,選季狀元風頭都被搶走,因為Alanna Smith太靚喇!鳳凰城水星(Phoenix Mercury)以首輪第8順位,選中史丹福大學澳洲國手Alanna Smith,在場傳媒見到呢位1米9高妹都呆晒,因為相比起其他籃球員,Alanna外表的確贏晒,雖然佢都非常高大但勁均勻,睇佢IG嘅福利相,Alanna原來仲好好身材添,梗係成為追訪焦點啦。
Alanna出身自籃球世家,父母都係澳洲籃球國手,佢亦都好叻女,16歲起代表澳洲參加各分齡世界賽,之前順利成為大國手,曾協助澳洲喺2017亞洲盃同2018世界盃女籃勇奪銀牌。佢喺史丹福大學讀書都係風頭躉,因為佢場內場外都咁吸睛囉。
現年22歲嘅Alanna,今夏就史丹福大學心理系畢業,呢位來自墨爾本嘅靚女前鋒,即將踏上WNBA職業籃球大舞台,大家第時一定要留意呢位鳳凰城水星新人喇!
支持本地運動員,一齊去「睇體」!
東網體育FB同你追實體壇每個精彩時刻!