紅軍衝冠又撞車仔 高普:請唔好再講5年前

20190413
東網電視
更多新聞短片
(Getty Images/互聯網)
利物浦周日主場決戰車路士,在此衝冠重要時刻,不禁令人聯想起5年前2014年同一景況,當時只要全勝即可奪冠嘅利物浦,在關鍵一仗因謝拉特跣腳敗於車路士腳下,痛失錦標,今次又係對車路士,紅軍領隊高普於賽前記者會強調:「我一秒都冇諗過2014年,請各位記者唔好向我班球員提5年前嘅事。」
高普向傳媒下達呢個「禁問令」,主要原因係想保持信心,並希望幫球會創造歷史:「我哋要保持正面及向前看,呢個亦係我哋整個球季都做緊嘅事。我當然聽聞過5年前嘅事,但以前嘅事對我哋冇用,已經成為歷史,眼前只有周日嘅比賽。」
「當年沙拿仲喺車路士,但依家已經唔同晒,只有球隊名同波衫顏色冇變。」高普指出:「我好喜歡上場歐聯對波圖嘅比賽模式,現在我哋有重要目標要達成,但我唔會比較2014年同依家嘅陣容,1秒都唔會諗,我只講現在,我哋有正面嘅時刻。」
講到沙利帶領嘅車路士,高普指出:「車路士處於良好時刻,上場歐霸盃收起多名主力仍然贏波,主力夏薩特好突出,不過我哋都好好,而且有晏菲路主場,我哋要再一次使用主場嘅力量。」
支持本地運動齊去「睇體」!
東網體育FB同你追實體壇每個精彩時刻!
Follow東網體育IG一齊撐本地運動員!