【港超專版】傷患令艾里奧變得更強!

20190415
東網電視
更多新聞短片
傷患令艾里奧變得更強!
「浴火方能重生」傑志守將艾里奧(Helio)雖然不諳中文,但仍深明此理。這名近年頻頻代表香港隊出戰國際賽的巴西裔後衞,不幸在去年為港隊上陣時重傷,導致他在今季港超聯差不多缺陣了整個上半季,然而他未曾因此感氣餒,揚言「傷患使我變得更強」!
圖/文:黃雋謙
艾里奧來自巴西聖保羅州,2008年寂寂無名的他來到香港,為公民征戰6年後轉投傑志,自此成為「藍鳥」後防中流砥柱,為傑志贏盡錦標之餘,更為球隊出戰亞冠盃。國際賽場上,這名「森巴」援將在2016年入籍香港,為港征戰世界盃外圍賽等多項賽事。可是,去年3月為港隊出戰亞洲盃外圍賽對北韓時,一次跳頂落地不幸傷及十字韌帶,這次傷患足足花費8個月時間來康復。
談到感受,艾里奧坦言康復過程十分艱辛:「呢次傷患康復時間非常長,康復初期永遠都係唔容易,既要面對傷痛同手術,做物理治療時仲要行得非常慢,肌肉好虛弱,呢啲都曾經令我好沮喪。我要重新學習點樣行路、起跳同跑步,全部都係一個新開始。」要度過難關,心中一定要有堅毅的意志,滿懷希望的「Helio」表示,克服逆境能使人變得更強:「我唔認為傷患能夠阻止我繼續踢波,反而能夠令我成為更強嘅人,因為呢個正正係一個可以挑戰自己嘅機會,測試自己有幾強、意志有幾堅定。」
一向重視家庭的艾里奧,坦言每次傷患都會使家人感到擔憂:「我大女總係好驚我整傷,上次為傑志作客馬來西亞,我喺一次碰撞之後跌低,仲趴喺地上一段時間。我太太之後同我講番,我大女對住電視機喊,哈哈!但我知道佢係因為緊張我先會咁,有佢哋支持先有依家嘅我,多謝我嘅家人。」
要克服難關,戰友的支持是不可缺少,艾里奧感謝球隊「第十二人」的支持:「球迷喺我受傷嗰陣幫到我好多,有啲仲Send訊息鼓勵我,甚至有球迷嚟醫院同我屋企探我,真係非常窩心。即使傷患曾令我感到好沮喪,但係球迷嘅行為確實鼓勵到我。」
香港球壇之中,艾里奧乃其中一位與球迷關係非常密切的球員。「粉絲」賽後在球場外等待球員,「Helio」往往會主動握手答謝。他向記者分享了一段印象深刻的往事:「記得2016至17年球季,傑志最後一場要贏到東方龍獅先可以奪冠,最終我哋贏4比1。球證吹雞一刻,所有球迷衝晒落嚟球場,真係太瘋狂!我知道佢哋咁做係唔啱,不過對我嚟講真係太深刻啦!」
最後,記者好奇問起他來港征戰多年,眾多中堅拍檔之中,哪一位與他最合拍,他笑言這條問題非常難答:「我曾經喺傑志同過好多位中堅球員合作,列斯奧、『阿凱』、金奉珍等等。不過始終同我最有默契嘅係法圖斯,因為我哋喺球會合作過6年,之後又喺香港隊做拍檔,所以佢同我最合拍。」