【港超專版】重出江湖　廖富源：多謝老婆撐我！

「每次落場都當決賽咁踢，因為唔知下次係幾時！」3年前效力天行元朗後淡出港超賽場的門將廖富源，今季獲東方龍獅邀請重出江湖，儘管東方擁有葉鴻輝，令「阿源」上陣機會不多，但隨着心態改變，他不忘提醒自己︰「以享受嘅心態去踢，唔會畀壓力自己。」

■圖/文：陳焌鏗

與「英雄輝」做隊友，雖然令廖富源獲得較少出場時間，但他卻指能與港隊首席門神競爭，已有所得着︰「我同『阿輝』（葉鴻輝）始終有一段距離，係難爭出場機會，但有競爭先有進步，每日同佢練波，見到佢對自己嘅要求好高，令到我都想將目標訂高啲，喺所有細節位都會想做得好啲。」同時，作為球隊的副選門將，「阿源」認為時刻都要做好準備：「雖然『阿輝』係必然正選，但你都唔可以差太遠，其實都有少少壓力，因為你唔會想畀『阿輝』拋開一大截。」

事隔3年投身頂級聯賽，更要與「鋼門」競爭，廖富源解釋一切全因另一位「香港鋼門」、現任東方龍獅門將教練范俊業︰「我離開係因為自覺突破唔到，所以寧願踢甲組。直到『范Sir』問我有冇興趣返嚟，我知道跟番佢可以令自己有所進步，所以就決定上番嚟頂級聯賽。」對於這位恩師口中的一字一句，「阿源」都會一一牢記︰「佢成日同我講放膽啲去做，唔需要去特登證明自己可以有幾叻，只要話畀人聽我哋有能力做到，呢番說話我銘記於心。」

截至現時為止，廖富源只有2次上陣機會，但「阿源」已心感滿足：「今季都算達成到自己季初訂下嘅目標，始終闊別咗3年，依家練波可以跟到個訓練量，又有出場機會，其實已經好大得着。」

一路走來，「阿源」除了感激「范Sir」，還要多謝家人的體諒︰「初初人工唔高、市道唔好嗰陣，媽咪都毫無怨言去支持我。依家老婆都係咁，佢覺得趁年紀後生，做到自己想做嘅嘢就繼續，我都好衷心多謝佢哋。」

【Profile】

出生日期：1990年8月21日

身高：1米77 體重：71公斤

位置：守門員

曾效力球隊：公民、天行元朗、晨曦、黃大仙

現效力球隊：東方龍獅

球衣號碼：26