港超聯　夢想FC東方龍獅青衣場鍊過！

周日（21日）「中銀人壽香港超級聯賽」尾場賽事，夢想FC在青衣運動場鬥東方龍獅。雙方主帥盼望今仗能夠藉贏波重拾信心。（周日下午5時30分開賽）

夢想FC上周於「菁英盃」4強以1比4不敵理文，無緣進身決賽，主教練梁志榮坦承該仗主力馬高斯缺陣有影響，但強調爭勝心不及對手才是勝負分野︰「球隊冇咗馬高斯，點都會有影響，始終川瀨浩太同馬高斯踢法唔同，其實喺賽前都安排咗一啲部署畀川瀨浩太，而佢都做到，可惜球隊發揮冇咁好，決心唔夠大，同紀律上做得唔好。」「FatGor」林衍廷是役因累積5面黃牌而要停賽。

東方龍獅上場狂攻下悶和理文，主教練安祖史杜錫承認：「入唔到波係目前最需要改善嘅地方，要贏波就要進攻球員更加集中去爭取入球。上場除龍門之外，全隊都踢得唔好，我哋要改善入球能力，就算係中場、後衞，我都期望佢哋可以透過死球去入波。東方係一支有野心嘅球隊，每場我都希望贏波！」前鋒艾華頓現時有輕傷，迪高亦要停賽，儘管早前受傷的翼鋒麥基已康復，惟狀態成疑。