港超聯　川瀨起孖！夢想FC賽和東方龍獅

「中銀人壽香港超級聯賽」周日（21日）假青衣運動場上演的尾場賽事，主隊夢想FC憑日本防中川瀨浩太梅開二度，一度以2比1反超前，惟在比賽尾段遭艾華頓為東方龍獅射入扳平的一球，最終兩隊以2比2打成平手，兩隊在和波後於聯賽位置不變。

夢想FC開賽不久雖然有彭超然中路抽射高出，惟客軍隨後攻勢浪接浪，14分鐘先有笠臣接應徐德帥橫傳起腳高出，21分鐘則有娥眉月頂罰球直射柱邊出界。東方龍獅戰至24分鐘先開紀錄，林嘉緯接應徐德帥左路角球尾柱位頭槌建功，艾華頓於1分鐘後扣過謝家榮起腳入網，惟被判越位在先。落後一球的夢想意圖收復失地，戰至28分鐘有亞哥斯達主射罰球被葉鴻輝接實。38分鐘，梁子駿右路回傳予川瀨浩太起腳高出，而雷文迪則於41分鐘在禁區外抽射，被葉鴻輝接實。東方龍獅於45分鐘有利馬彭利拿把握角球攻勢，頭槌二傳予梁振邦頭槌攻門中柱，客軍半場領先1比0。

主隊於換邊後一度反超前，在6分鐘內取得的兩個入球均由川瀨浩太包辦，這位日本防中先於57分鐘接應柏保路右路傳中頂入扳平一球，隨後63分鐘則接應亞哥斯達左路角球近門頭槌攻門入網，將比數改寫為2比1。客軍戰至67分鐘有徐德帥中路殺入禁區單刀時與謝家榮有碰撞，後者及時因傷退下火線，由屠俊翹入替。東方於76分鐘扳平，姚浩明右路角球傳予利馬彭利拿頭槌攻門被敵衞護空門，艾華頓把握對手解圍不遠近射追成2比2，球隊在1分鐘後更有艾華頓禁區頂抽射中楣，不過雙方之後再無入球進帳，最終保持2比2的戰局至完場。

夢想FC主教練梁志榮賽後表示：「上星期嗰場波之後，有啲球員心情都未平復，球員發揮好好，只不過上半場好多嘢都未回復到或者好多嘢影響到，所以發揮冇咁好。下半場就好啲，用個波啲時間多咗，傳球速度都快咗。」他又稱日後會再提醒球員在罰球、死球盯人要再集中些，以避免失球。

東方龍獅中場林嘉緯則指，球隊賽前曾為聯賽餘下賽事定下目標：「賽前球隊有個共識，希望可以贏埋淨番嗰幾場波，始終就算唔睇成績，我哋要同球迷交代。今年球迷對我哋有期望，但係我哋就令佢哋失望，所以贏波係球員基本要做嘅事，就算唔為球迷都要有同自己有交代。」對於球隊未能全取3分，「嘉緯」則認為問題並非僅於今仗存在：「今日球隊有先開紀錄，基頓受傷係一個意外，但係唔可以賴落去有球員受傷，而令球隊贏唔到波。球隊喺一啲防守嘅情況出現咗問題，好多對抗性尤其是應付兩邊傳中波都相對弱，令我哋今季好多應該贏嘅賽事打和。如果球隊下季想進步同挑戰冠軍，就必須要去檢討。」