司機瞓着釀恐怖車禍　捷克國腳爆頭慘死

唔止足球睇波，仲有24小時滾動賠率，即時體驗：https://bit.ly/2UmNL0L　

捷克國腳前鋒蘇維爾，剛於土耳其遇上恐怖交通意外，小巴翻車引致多名球員受傷，最後蘇維爾傷重不治。今年28歲嘅蘇維爾，為效力球隊土超阿蘭亞斯堡比賽完後，搭球隊小巴返回阿拉尼亞市途中，因為2名司機齊齊瞌着覺關係，導致小巴翻側釀成嚴重交通意外，最後蘇維爾不幸去世。之前踢過英超紐卡素嘅前鋒柏比斯施斯，以及利物浦後衞哥爾卡亦在小巴上，但就冇生命危險。

現時於土超排第5嘅阿蘭亞斯堡，於今輪聯賽鬥卡塞利踢成1:1平手，賽後蘇維爾、柏比斯施斯同哥爾卡等7名球員，一齊搭球隊小巴離開，估唔到呢段旅程係死亡之旅。小巴開到約離阿拉尼亞市5公里嘅公路失事，成架小巴嚴重撞毀，全車人士全被即時送到醫院，其太太推住BB車趕到醫院，諗唔到已成永訣。蘇維爾太太早兩周先為蘇維爾誕下女兒。

阿蘭亞斯堡會長卡胡蘇奴爾，即時去到醫院探望傷者，之後佢對記者講：「蘇維爾頭部同身體各部份有好多斷裂迹象，好不幸佢已經過身。」據當地報道，今次意外係由於司機揸車時瞓着而出事，據報當時車上有2名司機，佢哋同時瞌眼瞓，呢次真係累死人。蘇維爾司職前鋒，曾20次為捷克國家隊上陣射入1球，之前曾效力利巴域同布拉格斯巴達。