亞協盃　和富大埔旺角激鍊4.25 SC

亞協盃I組一連兩日均有香港球隊主場出擊，今日率先上演榜首大戰，和富大埔在旺角大球場迎戰北韓球隊4.25 SC，雙方首兩仗均全取6分，目前「綠戰士」僅因得失球不及對手屈居次席。和富大埔主教練李志堅表示，球隊周六將在港超聯賽作客富力R&F，但今仗仍會盡力擺出最強陣容力抗強敵！（Now 633 周二晚8時直播）

和富大埔將於周六聯賽作客富力R&F，只要贏波便可奪冠，該隊目前於亞協盃I組跟4.25 SC各得6分，主帥李志堅（下圖）希望球隊能夠在港超及亞協盃之間取得平衡︰「我哋喺5日內踢兩場，時機嚟講一定唔係最好，兩場波都好關鍵，大家都視呢一場波為出線關鍵賽事，因為係我哋主場。球會上下都認為周六爭聯賽冠軍相對較重要，惟有喺中間攞個平衡。我哋代表香港，唔想大家失望。希望喺14、15個常規球員當中，可以有6個輪換，呢個係最理想嘅情況，無論對球會、球員同球迷，都盡咗最大嘅交代。」

喪練防死球招數

和富大埔昨午於廣福球場進行操練，期間多次作出應付死球的訓練，「堅Sir」坦言對手不易應付，亦就觀看對手比賽片段作出適當部署︰「我哋睇番4.25嘅比賽片段，佢哋喺死球方面幾有心思。以最近幾場波嚟睇，佢哋喺呢組係較強嘅一隊，相比起黎明SC，黎明有嘅嘢佢哋都有，唔同嘅係佢哋有更多經驗同變化，而且比較老練，中場變化多啲，肯定難應付。」

客軍主帥：重點Mark哈利

早於周日（28日）抵港的4.25 SC，先後擊敗航源和傑志，取得分組賽兩連勝。今面對同樣取得6分的和富大埔，主教練吳文申表示球員目前狀態未受舟車勞頓影響，並認為和富大埔與傑志實力相若，不容忽視。他又點名需重點防守伊高沙托尼、利馬和哈利，特別哈利擁有身高優勢。問及旺角場會否影響球隊發揮時，他坦言雖然球隊主場是仿真草，旺角大球場是真草，但相信問題不大。至於後衞權仲赫則稱上場對傑志是一個很好的經驗，有助今仗爭取分組賽3連勝。

4.25 SC主力射手金有成和安日范曾先後成為亞協盃神射手，金有成今屆分組賽更連續兩場取得入球。另外，該隊兩戰保持零失球，足證防守力強橫。