阿積士淪落人變復仇者聯盟

絕密數據！睇彩報歐聯攻略：https://bit.ly/2GKbm6E　

歐聯4強大戰，今晚有阿積士作客熱刺踢首回合。客隊陣內有兩個英超棄將包括中場杜辛泰迪治同中堅戴利白蘭特，之前喺英超都係發展平平，舊年暑假齊齊變身淪落人，過嚟荷甲阿積士過新生。好彩，佢兩個都係個有料之人，今季表現表現脫胎換骨，直頭復仇者聯盟上身，喺歐聯遇神殺神，遇佛殺佛，今晚出訪老對手熱刺，杜辛泰迪治同戴利白蘭特係時候再打身價波，向問鼎歐聯美夢全力進發！

9個月前，杜辛泰迪治仲喺英超幫緊修咸頓護級，不過眨吓眼嚟到今日，呢位塞爾維亞球星就已經錄得個人今季第34個入波同21次助攻，認真犀利！至於戴利白蘭特之前喺曼聯唔算太得到前領隊摩連奴信任，經常喺不同位置輪換，只係嚟到今季，佢已經成為阿積士堅固防線嘅重心，兩個英超棄將總算成功翻身。

其實杜辛泰迪治同戴利白蘭特可以嚟到阿積士重生，都要多得球會改變政策，阿積士嘅經理坦赫治同足球總監奧華馬斯都一致認為，球隊喺上季嘅爭霸路上，最缺乏係嚟自廿多歲球員一代嘅經驗。結果，阿積士選擇分別以1,000萬鎊簽入杜辛泰迪治，同時以基本轉會費1,400萬鎊簽入戴利白蘭特，呢兩個轉會費數目，都只係較2008年佢哋以球會紀錄1,463萬鎊簽入蘇利馬利相差唔遠。

更重要一點，係全靠佢哋加盟，杜辛泰迪治成功帶起天才中場法蘭基迪莊，至於戴利白蘭特亦同新星馬菲斯迪歷特組成最強防線。相信任何當日曾質疑阿積士買貴咗嘅人，今時今日都會發現原來呢兩單交易係最成功，最抵買囉！