堅Sir喊爆：錢係重要，但未必買到冠軍

於完場一刻激動地衝向作客球迷一起慶祝，在接受傳媒訪問時更感動落淚的和富大埔主教練李志堅，於賽後表示：「好開心我哋和富大埔攞到今場嘅勝利，攞到今屆嘅聯賽冠軍。職業足球，錢係好重要，但係和富大埔話到畀大家聽，錢可以買到好多好球員，但未必買到冠軍。球員成季嘅表現話畀大家聽，堅持自己嘅信念、夢想，係有機會成功。今日攞到冠軍好好彩，但係如果真係唔好彩，我覺得我哋都贏咗個過程。」

「堅Sir」亦稱讚一眾球員沒有放棄：「我哋喺半場嘅時候針對番上半場發揮得唔好嘅地方，對手部署得好好，令到我哋喺中間位置頻頻失機。半場我哋換入陳肇鈞，希望可以進取啲，主導番中場，從而希望伊高沙托尼有多啲踢波機會，呢個係我哋嘅部署。

另外，半場嘅時候我哋都同球員講：『我哋冇嘢可以輸！』大家都成日講我哋要盡力去爭冠軍，咁咪要做出嚟囉，去到最後一分鐘唔放棄，我覺得盡咗力，而球員表現好都係關鍵。」對於在聯賽封王會否有助球隊在足球明星選舉的選情，「堅Sir」則笑言：「我哋都已經得到最好嘅禮物，有獎梗係好啦，大家諗諗我啦！」