對前六數據激恐怖！利迷靠晒你喇華Dee

《彩報》豪裝，入市即贏！撳撳呢條Link，寶藏等你拎：http://win.on.cc/football/　

全球利物浦球迷集氣，祈求今晚華Dee射爆曼城！本季英超即將煞科，利物浦只剩番1場賽事，而曼城仲有2輪，如果藍月亮攞足6分，利物浦下仗就算贏狼隊100:0都冇用，只能遺憾地成為英超史上最高分亞軍。今晚深夜曼城主場出擊，面對近期狀態一流嘅李斯特城，紅軍當然望曼城失分，自然都寄望李城射手占美華迪有波入。華Dee一向係大賽球員專搞Big 6勁旅，歷來34次轟爆前六球隊大門，數據認真犀利。

李斯特城16年爆出百年大冷勇奪英超冠軍，其中占美華迪就係奪標功臣。球隊靠穩健防守打江山，再利用華Dee飛快速度及強勁把握力進行反擊。雖然雲尼亞里已離開，但球隊基本上都係靠呢招搵食，曼城擅打攻擊足球，事實上係啱晒李城發揮。而本季李城作客表現排英超第7，攞到25分，僅比喺主場攞少1分。

李斯特城由前利物浦領隊羅渣士執教後，華Dee出場8次射入8球狀態火熱，目前已錄得18個聯賽入球，依然有機會爭神射手。另外華Dee對親前六球隊，都幾乎畀到麻煩強敵，佢曾經8次射爆阿仙奴大門，7次於利物浦身上取得入球，並4次射破車路士門將十指關；而面對曼城、曼聯及熱刺，佢亦各取得5個入球。而近4季英超華Dee以31個入球，壓倒阿古路（29球）同哈利卡尼（22球）成為攻入英超前6球隊最多次數球員，唔知佢今可唔可再接再勵，為英超爭標形勢帶來巨大影響呢？