【東體爭議】阿蘇倒戈入波慶祝有錯咩？
20190507
東網電視
更多新聞短片
(Getty Images)
巴塞隆拿將於周三(8日)凌晨歐聯4強次回合作客利物浦，亦係巴塞射手蘇亞雷斯重返成名地晏菲路球場倒戈。呢位烏拉圭國腳似乎驚被紅軍球迷噓爆，講明今場入波，唔會慶祝。
蘇亞雷斯「備戰」充足，飛赴利物浦途中，已經先喺社交網發貼話：「我回來了，晏菲路，能夠重逢令我好激動。」之後阿蘇又發放喺晏菲路球場操練嘅相片，話可以返到自己熱愛嘅地方，感覺好正，永遠感激呢度。
咁都未止，蘇亞雷斯出席記者會時，再次多謝利物浦畀佢度過幾年美好時光，係球員生涯之中獨一無二嘅夢幻經歷。
最關鍵問題出現，如果蘇亞雷斯今場入波會唔會慶祝呢？佢話：「無論我是否慶祝入球，人哋都知4強入波係幾咁重要，我非常尊重利物浦，如果我冒犯咗人，希望原諒我，我好感激利物浦，如果我今場又入波，就唔會慶祝。」
蘇亞雷斯喺首回合入波後慶祝，引起利物浦球迷不滿，指佢忘恩負義，準備今場噓爆佢，阿蘇可能受到壓力，賽前大賣口乖，希望利迷手下留意。
其實蘇亞雷斯已經離開利物浦5年，依家各為其主，就算返到晏菲路球場倒戈入波慶祝，有錯咩？
不過，巴塞有3球在手，而蘇亞雷斯亦已經3年半未試過歐聯作客入波，睇來佢今場未必有機會「得罪」利迷。
東網體育FB同你追實體壇每個精彩時刻！
Follow東網體育IG一齊撐本地運動員！