超陰濕專登整傷羅拔臣　蘇亞雷斯奸有奸輸

《彩報》豪裝，入市即贏！撳撳呢條Link，寶藏等你拎：http://win.on.cc/football/　

本身係利物浦英雄，一次歐聯對賽變狗熊，蘇亞雷斯雖然歐聯4強兩回合做足醜人，但最後都被紅軍大逆轉淘汰出局，相信佢會非常難受，但全球利迷都應該得一個反應，就係抵佢死！首回合倒戈鏟草慶祝、又不斷出小動作挑釁紅軍球員，令哨牙蘇今次回歸晏菲路被噓足全場，但佢堅唔抵幫，於半場完結前乘安德魯羅拔臣走埋自己身邊，竟然收慢腳步起後腳絆羅拔臣，直接令呢位紅軍助攻王受傷離場，真係陰濕到爆！

上仗賽前已表明會入波慶祝嘅蘇亞雷斯，講得出做得到，並於魯營多番挑釁紅軍球員包括艾利臣等，令紅軍球迷睇到眼火爆。雖然於次回合前，阿蘇再講好話，話利物浦對佢好重要又乜又物，但利迷冇賣佢帳，今仗佢一攞波，甚至準備攞波嘅一刻，已經全場噓聲四起。

今仗半場前，阿蘇更盡展陰濕本領。當時羅拔臣從後走埋去佢身邊防守，蘇亞雷斯專登放慢腳步，有意識地起後腳踢上，羅拔臣即時絆倒受傷。雖然呢名左閘頂得完半場，但下半場已踢唔到，阿蘇可謂求仁得仁。不過呢個世界有句說話叫奸有奸輸，巴塞恥辱性出局，身為球隊主力，阿蘇應該都冇咩面見人。