足總盃　當「巨人殺手」遇上「藍鳥」

「足總盃」周五（10日）晚於旺角大球場上演第一場4強對決，由「巨人殺手」夢想FC與「藍鳥」傑志爭奪決賽席位。上一圈加時以2比1淘汰和富大埔出局的夢想FC，主帥梁志榮期望球隊能貫徹風格全力爭勝；至於正受傷兵困擾的傑志，主教練朱志光希望小將趁機證明自己實力，協助球隊殺入決賽。（開賽時間：周五晚8時）

傑志上周於港超聯賽作客提早宣布護級失敗的凱景，強攻不果僅憑佐迪完場前的入球，以1比1逼和對手。主教練朱志光認為，「藍鳥」在下半季長期有前線主力倦勤，令埋門發揮受到影響，但同時稱讚陳晉一及巴拉克等小將表現不俗：「始終球隊冇咗中鋒，盧卡斯同泰迪都受傷，要佐迪4日打兩場波，喺跑動方面要求較高。我哋嗰場出咗四十幾球波，但都頂唔到，把握力係有啲唔好，不過慶幸新人表現唔錯。球隊依家有唔少球員受傷，正正係年輕球員爭取機會嘅時候。」

談到8強淘汰出爐港超冠軍和富大埔的夢想FC，「朱Sir」強調不容忽視：「對手中前場都強，所以絕對唔可以睇低佢哋，不過淘汰賽一場過嘅比賽，真係好視乎臨場發揮。」

至於剛於周日聯賽主場以6比0大炒理文的夢想FC，主教練梁志榮稱對賽果感意外，卻重申士氣並非只能靠一場勝利建立，球員爭勝決心同樣關鍵，「細榮」透露球隊於比賽日後決定放假一日讓球員休息，但基於眾將季尾出現疲態或厭戰，最近一周操練傾向進行一些趣味性較高或強度較低的訓練。球隊周四（9日）午操練期間集中練習主射12碼，「細榮」期望球隊保持風格，全力與強手爭勝︰「球隊踢法一直冇乜改變，都係以用波為主。希望保持到呢個踢法，期望可以『偷雞』殺入決賽。」傷兵方面，阿根廷進攻中場亞哥斯達因上仗拉傷大腿缺陣。