果然係難兄難弟！俄羅斯兩國腳有監同坐

俄超「一哥」辛尼特前鋒高哥連、「三哥」卡斯洛達中場馬馬耶夫兩名俄羅斯國腳，因為醉酒傷人，同被判監年幾，球迷有排都唔使見到佢哋。

呢兩個曾經參加2016年歐洲國家盃嘅俄國國腳，因為去年10月喺莫斯科一間酒吧醉酒打人，日前喺Presnenski法院被判「毆打」及「流氓罪」罪成入獄，其中高哥連被判踎監18個月，佢細佬一樣要坐年半，馬馬耶夫就判囚17個月。高哥連今年28歲，坐完出嚟仲有機會踢返波，成31歲人嘅馬馬耶夫似乎牙煙啲嘞，主要係未必有球會肯收留一個咁大年紀嘅釋囚。

高哥連、馬馬耶夫醉酒鬧事早有前科，試過為咁坐波監，今次搞到真係踎監，原因係REN TV發布片段顯示，有幾個人被認定參與毆打著名電視節目主持人Olga Ushakova個司機，Olga其後報警，投訴司機被打之餘，指控有關人等打爛佢架車嘅車窗同後門，結果根據衣著等訊息判明，高哥連同馬馬耶夫都有份。