【睇片】17歲日本美斯入靚窩利　正牌都唔掂

17歲「日本美斯」久保建英周日 (12日)射入個人今季日職第一球，協助榜首嘅FC東京主場1比0小勝磐田山葉，取得球會史上第250場勝仗，並且確認獲日本足協點名，6月初升格大國腳出戰美洲國家盃，但係FC東京居然唔願放人！

今季喺FC東京表現活躍嘅久保建英，踢到84分鐘時，把握角球混戰機會左腳凌空抽射奠定勝局，首次喺日職入波，佢呢球畀日本傳媒形容係「藝術窩利彈」，監督長谷川健太大讚佢嘅「射術係Top Class」，成為周日日職繼神戶勝利船1球不敵鹿島鹿角，聯賽6連敗跌近護級區之後，另一焦點新聞。

FC東京方面同時證實，呢個月23日已經跳級代表日本U20參戰世青盃嘅久保建英，又接到日本足協邀請，希望球會放佢出戰A級嘅美洲國家盃。由於日本只係以嘉賓身份參戰，足協冇權夾硬要人，所以就正式必須徵得FC東京同意先得。問題係，如果連打兩項國際賽，久保建英就會成個月踢唔到聯賽，對於志切爭標嘅FC東京好不利，所以佢哋個社長大金直樹極度唔願意：「聯賽進行緊嗰陣離開？同有關方面傾傾先啦。」完全唔肯應承。