亞協盃　和富大埔揮軍平壤強戰4.25SC

新鮮出爐港超聯冠軍和富大埔，繼今年3月亞協盃附加賽後，再次揮軍北韓平壤，出戰亞協盃I組分組賽，惡鬥小組「一哥」4.25SC。儘管王牌伊高沙托尼停賽，但今仗是關乎出線的榜首戰，故主帥李志堅希望一班手足能全力而赴，擊敗強敵。（周三下午4時開賽）

由於I組只有首名可以出線，故主場曾以1比3不敵4.25SC的和富大埔，今日再碰頭乃名副其實的背水一戰。話雖如此，但「堅Sir」強調不會輕舉妄動：「雖然今場波形勢上係必須要贏，但我認為嚟到作客環境，對手踢法比較體力化，球場大亦對佢哋有利，所以我都係希望穩守先。」至於主力射手「伊高」累積兩黃，今仗要坐波監，但「堅Sir」指由於場地較大，對擅打反擊的伊高沙托尼未必有着數，所以會從踢法上作出改變，應付這場大戰。

不過，和富大埔今日要成功復仇絕非易事，一來4.25SC貴為北韓班霸，實力強橫；二來陣中多名主力狀態大勇，包括上次在港兩度射破「綠戰士」大門的金有成，以及另一北韓國腳安日范，今仗在金日成球場主場出擊，對由艾華度率領的和富大埔防線而言，實屬超大考驗。