和富大埔勝利巡遊　堅Sir︰希望繼續進步！

周日（19日）於主場球迷面前高舉冠軍獎盃的和富大埔，球隊於煞科戰對夢想FC完場後完成頒獎典禮後，再於區內舉行巴士勝利巡遊，期間球隊教練團與球員均有下車與球迷合照和派發海報。「綠戰士」主教練李志堅於賽後則指，自己希望可以繼續進步，無論在大埔或其他地方也好。「堅Sir」又指，今季球隊參與亞洲賽事是個很好的學習，並表示自己是否留在大埔的關鍵，是在於球會是否希望走得更遠︰「我哋依家贏咗個聯賽冠軍，當然再贏的話都會開心，不過今次踢亞協盃對4.25 SC，自己係覺得大家係有距離。作為職業球會，要知道下年點樣準備應付亞冠附加賽，經過今季之後會知道大概有啲乜嘢可以改進，呢個係我自己嘅諗法。球員係會想贏，呢個係事實，球會可以有唔同方向去搞足球，但個方針可以係乜嘢呢？希望大家個想法可以一致。」

和富大埔足主蔡尚圻則表示，假若「堅Sir」不跟他合作就不會再「搞波」，但目前已給予他最大自由度去為下季組班，並透露球隊有部份人腳經已落實，惟詳情則未能透露︰「其實贏咗個冠軍梗係好開心，但呢個冠軍唔係只屬於我哋任何一個人，而係大埔呢個地方，呢隊波每一個球員、教練同職位都好盡力，佢哋今年得到呢個回報，我覺得係應該嘅！」