總結：速龍追平公鹿　李安納永世食免費餐？

周三(22號)NBA季後賽東岸決賽Game 4大戰，速龍主場以120比102大破公鹿，總場數追成2比2平手。速龍今場贏在全體球員交出水準表現，王牌球星李安納負傷作戰下攻入19分，不過控衞路維打出明星級表現，個人獨取25分，加上後備球員交足貨，伊巴卡有17分同13個籃板，諾文鮑維亦有18分，眾志成城下成功擊退公鹿。

李安納上場喺雙加時大戰打足52分鐘，大腿同膝頭都有傷，但佢依然奮力作戰，雖然進攻上明顯係水準以下，但防守上就繼續有超卓表現，錄得4次偷波同2次封阻，第一節「靚封」安迪杜甘保就顯示出強大決心。

李安納今個夏將成為自由球員，速龍球迷為咗挽留呢位超級英雄，有球迷組織特別印製一批「李安納食免費餐」標籤，並且建網站進行宣傳，希望多倫多所有餐廳同食肆響應，容許李安納永遠喺多倫多免費用餐，據報目前已有超過50間餐廳加入，認真夠噱頭！

今日戰果 (前者主場)

速龍　120:102 公鹿 (總比數2比2)