瘋傳回歸日職!雲格隨時上錯賊「船」!

20190526
東網電視
更多新聞短片
《彩報》豪裝,入市即贏!撳撳呢條Link,寶藏等你拎:http://win.on.cc/football/ 
雖然星期日(26日)喺主場大勝湘南比馬4比1,終止咗聯賽加盃賽連輸9場嘅肉酸走勢,日職暴發戶神戶勝利船依然搏命搵緊名宿揸旗,據報佢哋向處於半退休狀態嘅前阿仙奴主帥雲格招手,已經將一份2年半合約畀咗佢,去到2021年,年薪高達400萬歐元(約3,513.4萬港元),但係雲格仲考慮緊。如果雲格應承,佢就有機會執教VIP組合──韋拿、恩尼斯達、以及踢過阿仙奴嘅普多斯基。
其實雲格執教阿仙奴前,喺1995–1996年球季,曾經教過名古屋鯨魚(當年叫八鯨),仲當選最佳監督,又贏埋96年日皇盃,對日本文化可以話非常了解,而且呢位69歳教頭,唔只精通法語,阿爾薩斯語,德語同英語,連西班牙語、日語都有一定程度,由聲望、執教能力至語言,帶神戶勝利船一啲困難都冇,問題係佢肯唔肯幾十歲人,仲離鄉別井過嚟亞洲搵食啫。
另一個問題係,神戶勝利船近年咁肯燒錢都唔掂,日本有雜誌就話係背後金主、樂天集團代表董事三木谷浩史,經常插手球隊事務,連教練排陣都指手劃腳,雖然第二次出嚟做頂檔監督嘅吉野考行話「冇咁嘅事」,不過雲格如果收到風,真係未必睬佢。
自4月14日以嚟,第一次贏波嘅神戶勝利船,星期日賽後沉浸喺一片歡樂氣氛,不過班高層對於係咪傾緊雲格就守口如瓶,既唔承認亦唔否認,三木谷浩史只係回應一句「未有具體行動」。