痛失摯友　法比悼念雷恩斯一字一淚

一代西班牙巨星殞落，雷恩斯車禍逝世，一眾球員均喺社交媒體帖文悼念，其中包括曾經同佢喺阿仙奴合作過嘅法比加斯。

雷恩斯喺效力阿仙奴嘅3季入面，曾經同過現時摩納哥球員法比加斯合作。兩位西班牙同鄉合作無間，仲做過室友，共同替「兵工廠」贏得2003/04年英超冠軍，更協助球隊打入2006年歐聯決賽。法比加斯對雷恩斯嘅死感到極度哀傷，喺Instagram發文悼念：「我永遠唔會忘記你同你家人，喺我16歲、最寂寞嗰陣招呼我嚟你英國嘅屋企過聖誕；我永遠唔會忘記我哋成日訓練前後，喺健身室打乒乓波嘅時光⋯⋯我哋永遠都唔會忘記你，永遠喺我哋心入面，請你安息！雷恩斯。」呢位前巴塞隆拿球員，仲話雷恩斯係其中一位同佢合作過最合拍嘅球員，喺球場上有種獨特嘅聯繫，盛讚佢係球壇上其中一位最有天分嘅球員。