雜技世界波天王　伊巴助攻畀自己倒掛！

講到入世界波，好多球星喺職業生涯都入唔少，但講到「雜技世界波」，一定要提伊巴謙莫域！雖然呂布已經37歲，但年紀大唔代表機械壞，依家佢副偈依然有料到，剛啱於美職佢又入超級世界波，呢球佢仲係自己助攻畀自己倒掛入波，堅係誇張到冇人有！

今屆伊巴狀態一流，洛杉磯銀河踢咗16場賽事，呢位瑞典戰神已入咗11球，今仗對新英倫革命更加射入黐線金球。當時銀河於右路展開攻勢，個波輾轉去到禁區內，伊巴用心口控個波落嚟，但對面2個守衞前無去路，佢突然將個波向後剔高，之後再轉身倒掛，個波應聲入網，堅係靚到爆。伊巴入完波之後啤住對手門將寸到爆，但係入得咁靚又抵佢招積。雖然攻入靚波，不過銀河最後依然輸1:2，若伊巴要攞美職冠軍，一班隊友堅要爭氣啲。